روتين العافية والحب والجمال لشهر سبتمبر

مرحباً بك على VELDAIRE

 حيث العافية والحب والجمال 

اليوم التدوينة بتكون سريعة خفيفة بكلمكم فيها عن روتيني الأسابيع الي فاتت في العافية والحب والجمال. نقول بسم الله؟

العافية

ركزت هذا الشهر على 3 أجزاء من عافيتي:

 (الروحية والجسدية والنفسية)

حبيت يكون هذا الروتين بسيط عشان استمر عليه وانضبط قدر الأمكان، وصراحة ما فكرت اثناء اختياري للعادات ولا حسبتها ابداً، بس اتبعت حدسي بداية الشهر ومشيت عليه.

1- الكتابة 

كل يوم الصباح أوّل ما أصحى وبعد ما أصلّي صلاة الفجر وأشرب كاسة الموية المنعنشة، أجلس وأكتب. تلاقيني مره أكتب بدافع الفضفضة ومره تكون كتابة روحية، ومره تكون كتابة بغرض التحرر. عموماً ما ركزت على نوع الكتابة قد ما أنه استمر بكتابة صفحة واحدة أقل شئ كل يوم. 

2- التأمل

هذا الشهر ركزت على نوعين من التأمل، التأمل الأول يخص الديتوكس والتنظيف الداخلي، والتأمل الثاني بخصوص الأمان، بالنسبة للتأمل الأول سويته مع دكتورة سمية الناصر على برنامج أنغامي ( Detox ) أسويه قبل النوم، أو في الليل لما أخلص كل اموري . التأمل الثاني أنا أسويه بنفسي وغالباً أسويه الصباح أو بعد الظهر.

3- الإمتنان

طبعاً أكيد ومؤكد أنه ما حيمشي روتيني بدون أهم شي في الحياة الي هوا الامتنان، فعلياً معرف كيف كنت أمشي في حياتي قبل الإمتنان! بس عقلي يحول مساره حبتين كل الي عليّا أسويه أقفل عيوني واستشعر بقلبي أمور أنا ممتنه إنها موجودة في حياتي، أمور حصلتلي، ناس حولي، كلمة قرأتها، أغنية سمعتها.

فعلياً الأشياء الي ممكن نمتن ليها أكثر بكثير بكثير بكثير من الأشياء الي ممكن نتذمر بسببها. وحلو كل يوم نعطي نفسنا  وقت نلاحظ هذه الأمور ونستشعرها.

في الامتنان عندي طريقتين: طريقة الكتابة وطريقة الكلام

في الكتابة استعمل هذا البرنامج على الجوال، أحبه جداً بسيط وسهل وسريع، أحط فيه صورة تعبّر عن اليوم واكتب امتناني وشكري وحمدي. حلو قبل النوم أو أي وقت أمسك في الجوال. أسمه gratitude 365

في الكلام أحاول أركز على الشي الي بمتن له، وأحط يدي على قلبي وأقول امتناني، أسويها بعد الكتابة. وممكن أحياناً في آخر جلسة اليوغا.

4-مراجعة المعتقدات

حطيت لنفسي ساعة يومياً أقعد فيها وأراجع معتقداتي وقناعاتي، ليش؟ عشان بكل بساطة، إذا حياتي كلها انعكاس لأفكاري، ليش أنتظر تلطشني الحياة عشان أفهم أفكاري؟ أحب أجلس وافهم أول بأول بكل حب وأمان الأفكار الي تظهر والمواقف الي تزعجني ليش تزعجني عشان استمتع بقوة عقلي في المكان الصح وعلى الأفكار المناسبة المفيدة. أشوف هذا شي مهم جداً لعافيتي النفسية.

5- الرياضة واليوغا

هذا الشهر التزمت بالرياضة واليوغا ومبسوطة من نفسي صراحة لأني قاطعت الرياضة من تقريباً بعد رمضان، واليوغا من قبلها بفترة، والحين سعيدة إني رجعت ومستمرة كل يوم بنفس الوقت أفرد سجادتي و أمارس رياضتي ويوغتي.

وهنا حابة أعلّق على نقطة مهمة جداً عملتلي تغيير كبير في شعوري تجاه وقت الرياضة، هوا طبعاً أكيد مو كل يوم عندنا نفس الحماسة، لكن الي سويته إني بحاول اذكر نفسي قبل وأثناء الرياضة بـ ليش قاعدة أسويها؟ وسببي إني أبغى استمتع بهذا الجسد وأشوفه يتجدد ويتطور، فكل مرة أتمرن اطالع في جسمي بنظرة المتعة نظرة السرور نظرة الحب نظرة الي: "ماشاء الله يا جسمي تقدر تسوي كل دا؟ قد ايش مبسوطة فيك ومستمتعة"

6- ألن يكون لطيف لو … ؟ 

هذا التمرين لطيف لطيف وسهل وسريع وينعنش مره مره قررت أمارسه هذه الفترة ومبسوطة عليه، كذا أحس شغّلت زر اللامستحيل.

تكلمت عنه هنا في تلغرام اذا تحب تعرف عنه أكثر

الجمال

بالنسبة لروتين الجمال الي يدخل فيه شوية عافية ركزت على هذه الحاجات على السريع:

1- غذائي

أشرب مشروبات عشبية (شاي وزنجبيل)، اكل فواكه وخضار  و اشرب لتر ونصف/لترين موية كل يوم.

2- الاعتناء الجسدي

هذا الشهر اعتمدت ماسك الطين المغربي للوجه وبعده أحط نوع ماسكات مرطبة بشوف نتيجتها وأتكلم عنها بعدين بإذن الله في انستقرام أو تويتر.

وبالنسبة لجسمي الليفة أهم شي مع غسول لطيف في كل يوم أسوي فيه رياضة، لأنه إذا تلاحظو إذا ما نظفتوا جلدكم بعمق ممكن يطلع حبوب بسبب تراكم الأوساخ والجلد الميت مع التعرق اليومي.

( كل شيء ثاني أسوه بخصوص عافيتي أحسه يدخل في جمالي كمان والعكس صحيح، العافية والحب والجمال يغذوا بعضهم البعض✨)

الحب

صراحة روتيني الوحيد في الحب، أني أحب كل يوم، بالقليلة حاجة وحده، وأعبر عن حبي لو مره وحده، واستشعر الحب لو مره وحده. المهم ما يعدي يومي بدون حب ولو لدقيقة وحده.

أخيراً 
هذه بعض من أهم أجزاء يومي لهذا الشهر. تبغوا الصراحة أكثر شي خلّاني ألتزم إني سويت الأمور بدافع المتعة، هذا خلاني أحس الأمور خفيفة على قلبي، بالأصح هي تخرج من قلبي، عكس كثير من المرات الي كنت أحسها مجرد مهمّة مسجلة على قائمة المهمات لازم أسويها وإن ما سويتها أنقهر من نفسي.

الإنجاز صعب كان بالطريقة الجافة، أما بطريقة المتعة والاستمتاع والحرية، الإنجاز صار أسهل بكثير. الحياة تستحق نستمتع بيها الآن ونستمتع بكل مرحلة فيها حتى لو ماكنت على مزاجنا، إذا ما اشتغلت بحب ومتعة الآن متى حتسوي كذا؟

كونوا بخير. كونوا بحب وعافية وجمال