برامج وتمارين رياضية نتائجها فتاكة

مرحباً بكم على VELDAIRE

حيث العافية والحب والجمال

بما أنه قاعدة أرتب لعودتي لممارسة الرياضة، حبيت أكلمكم عن بعض من البرامج والتمارين الي جربتها ونتائجها مره رهيبة واستفدت منها جداً. 

نقول بسم الله؟ (اضغط على الصور والعناوين لفتح الروابط)

1- 30-day butt lift program

هذا البرنامج من أول البرامج الي مشيت عليها في تمارين الجزء السفلي، تقريباً في 2016 أو 2015 ما اذكر بالضبط بس أذكر النتائج العظيمة الي طلعت بيها، استمريت ارجع له بعد كل فترة انقطاع من الرياضة.

إذا انتي متعودة على الرياضة تحتاجي تزيدي حدة التمارين شوية، بالنسبالي أصير أسوي الفيديو مرتين أو 3 مرات. 

هذا جدول التمارين

2- Flat belly program

الحين كيف أوصف لكم هذا البرنامج؟ أنا بطني ما أعاني من دهون الحمدلله، بس تحتاج تقوية عضل وشد، هذه التمارين وترتيبها سحر، بكل صراحة سويتها شعبان ورمضان بشكل متقطع وما كملت ال 30 يوم بس اسبوعين واقطع، والنتائج بااااانت فا متحمسة إني أكمل ال 30 يوم بإذن الله وأشوف النتيجة وابني عليها.

هنا تلاقو جدول التمارين (اضغط على الصورة) 

3- Core workout

هذا الفيديو جربته لفترة وحررريقة، الي تسويه وفجأة غاطسه في التعب والعرق هههه. أحب اسويه بعد ما اتمرن لشي ثاني عشان يكون جسمي كله متحمي ويحس بالتمرين. مره يقوي الكور تبعك.

4- Pushups for beginners

لو أحد قالي أقيم الجزء العلوي من جسمي حديه مقبول، مني قوية ابداً وفوق دا ما أحب أمرنه واطفش من تمارينه، خصوصاً البوش اب الي يخليني أحس بالفشل الرياضي ههههه. عموماً هذا الفيديو حل ازمتي مع البوش اب، هو صحيح الين الحين اسويها بس على ركبتي بس احسن من لاشيء. إذا احد يشاركني عدم حب تمارين الجزء العلوي قولولي وحسسوني بالانتماء.

5- Blogilates

هذي الانسانة رهيبة ومحفزة بشكل لا يصدق، أحب أنها تستخدم البلاتس بطريقة جديدة، لا يغركم شكل التمارين سهل بس يححرررق صح. بين الفترة والثانية أحب اسوي من التحديات الي منزلتها وبعض فيديوهاتها كتحدي لنفسي لأنو هذا النوع من التمارين أحسه صعب. 

هذي وحده من تحدياتها الي أبغى أجربها قريب بإذن الله (اضغط على الصورة)

أخيراً

هذي بعض من أهم المصادر الي استفدت منها خلال رحلتي مع الرياضة، إذا تحبوا نتكلم زيادة في هذا الموضوع اكتبولي في خانة التعليقات.

عموماً الرياضة ممكن تكون وسيلة عافية لانها تهتم بجسدنا وصحته ونفسيتنا، وممكن تكون ووسيلة جمال لانها تهتم بصقل جسدنا واظهاره بأفضل ما يمكن أن يكون عليه، ووسيلة حب لأننا نحب هذا الجسد والحب من مكوناته الاعتناء والاهتمام. 

الين التدوينة الجاية أشوفكم على خير وعافية وحب وجمال