كيف أصير مغمور بالجمال؟

مرحبا بك على VELDAIRE

حيث العافية والحب والجمال

نفسي أشوف الجمال أكثر في يومي، أيش اسوي؟

من فترة قصيرة وتحديداً في النصف الأول من عام 2019 لقيت نفسي واقفة قدام سؤال واحد ناتج من كمية أفكار ومشاعر ورغبات متداخلة:

 كيف أشوف الجمال أكثر؟

أحياناً ولأسباب كثيرة أنسى مدى جمالي، مدى جمال عائلتي، مدى جمال الناس من حولي، مدى جمال الأشجار والزهور والنباتات والسحاب والشمس والقمر والطيور والحيوانات، أنسى مدى جمال الفرصة المتاحة لي في هذه اللحظة، بأني هنا والآن على قيد الحياة في كوكب الأرض أشارك البشر هذه الرحلة الجميلة.

لسبب أو لآخر تقدر تلاقي الأفكار السلبية مدخل لراسي، وتقدر تحط حاجز بين عيوني وقلبي وبين الجمال.

كم مرة وقفنا قدام المراية انتقدنا أنفسنا وجسمنا وشكلنا وركزنا على عيوبنا وتجاهلنا محاسنّا؟ كم مرّة تسللت الغيرة لقلوبنا كون هذا أجمل وهذه أجمل أو حياتهم أجمل أو ملابسهم أجمل؟ كم مرة ركبنا السيارة ومشينا من مكان لمكان بدون ننتبه لجمال الشجرة الواقفة على طرف الشارع، أو السحابة الي تتحرك فوق رؤوسنا؟ 

قررت إني أبغى أتذكر أكثر، وأشوف أكثر هذا الجمال الموجود حوليّا في كل مكان. من هذا القرار نبعت فكرة تنفيذ سلسلة طريق الجمال المستلهمة من برنامج دكتور صلاح الراشد أتلانتس الي تحدث فيه عن الجمال في عدة حلقات.

ومن هذا القرار بدأت ابحث اكثر عن خطوات ودروس تساعدني أصير الاحظ واحس بالجمال أكثر، كيف أصير مركزة على الجمال، أشوف الجمال، وأسمع الجمال، بالمختصر كيف أصير مغمورة مغموسة بالجمال؟

في التدوينة السابقة تكلمنا عن أول خطوة في طريق الجمال وكانت فيها محطتين وقفنا عندها: نية الجمال + المعرفة والوعي بالجمال

وذكرنا في المعرفة والوعي بالجمال عدة خطوات مثل زيادة المعلومات والقراءة والاستماع في موضوع الجمال، وملاحظته حولينا، وتقليل الانتقاد في حياتنا، وزيادة الحضور

اليوم حنتعمق زيادة في خطوة ملاحظة الجمال كخطوة مهمة عشان نصير مغمورين بالجمال بجانب المعلومات وتقليل الانتقاد.

... نقول بسم الله؟

1- تأمل الجمال في الطعام

ممكن من أكبر الأسباب الي تخليني أحب أطبخ وأتعلم اطبخ، جمال الأكل، جمال الخضروات، جمال الفواكه، الجمال في غليان المويه، الجمال في شريحة الدجاج الي قاعدة تنشوي، الجمال في صوتها الشهي.

الطعام عالم جمال بحد ذاته، من اليوم حاول تأخذ من 10 ثواني إلى 30 ثانية فقط قبل تحط أي شي في فمك أو تستعمله للطبخ، لاحظ لونه، شكله، قوامه، ملمسه، تفاصيله. ممكن تسوي رحلة لعالم الطعام الجميل وتروح السوبرماركت، ألمس الخضراوات والفواكه، لاحظ الروائح والألوان، وعدّي على المخبز، واللحوم، والبقوليات والمكسرات. خليك مركز واستشعر واستمتع بكل هذا الجمال.

عموماً كل يوم ولمدة صغيرة لاحظ الطعام وجماله.

2- ركز على جمالك الخاص

زي ما ذكرنا في تدوينتا التعريفية بسلسلة طريق الجمال، الجمال هو مزيج من الخواص الداخلية والخارجية. كل شخص فينا أكيد يملك نسبة معينة من الاثنين، حاول تلاحظ هذا الجمال الداخلي والخارجي، حدده، ركز عليه، طوّره.

كل شخص فينا مميز بشكل ما، ولعلّه هذا من أكثر الأمور الي تخلينا جميلين، تعرّف على نفسك بشكل حميمي، انتبه على تفاصيلك الجميلة، إن كان في شي ما يعجبك في نفسك، تصالح معه، حسنه وطورّه، بس لا تقعد طول عمرك بس تنتقده وعايش دور المسكين! تحرّك، احتفل بالجميل وجمّل الغير جميل بأي طريقة تقدر عليها.

ممكن يساعدك على ذلك التسجيل بشكل يومي، سجل صفاتك الجميلة الداخلية والخارجية الي لاحظتها خلال اليوم.

3- اسأل السؤال الصح

كيف أشوف الجمال أكثر من حولي؟ أيش في أشياء جميلة الآن أقدر أركز عليها؟ كيف أقدر أزيد الجمال في نفسي؟ كيف أقدر أزيد الجمال في بيئتي؟ كيف أقدر أزيد الجمال في حساباتي أو في دفاتري أو على أجهزتي؟ 

استمر بالتساؤل حول الجمال عشان عقلك يركز عليه ويخليك تلاحظه. وطبعاً ما يحتاج 24 ساعة تسوي كذا، في بداية يومك فكر بهذا الشيء  لمدة دقيقة إلى خمسة دقائق فقط.

السؤال الصح يخليك تحط عيونك في المكان الصح، وسؤالك عن الجمال يجيب الجمال قدام عيونك أكيد. بس خليك صاحي مفتح عيونك عشان تلاحظه

4- استمع لموسيقى جميلة

الموسيقى تنشاف وتنحس وتنسمع، بالنسبة لي بس ابغى احس بالجمال أفتح موسيقى تحسسني بالجمال، خصوصاً في بداية يومي، أحس الأثر يمتد إلى نهاية يومي، في شي بخصوص الموسيقى يتخلل كل مشاعري وينظمها ويرتبها، وهذا بدوره يساعدني اشوف بوضوح أكثر وانغمس بالجمال الي حولي بصرياً وسمعياً وحسياً.

لاحظ ترتيب النغمات واختلاف الألحان وتخيل طريقة عمل الآلة الموسيقية، لاحظ كيف ممكن عدة ضغطات متفرقة على البيانو تخلق لنا شي جميل نستمع له!

بعض من الموسيقات الي أحب ابدأ فيها يومي واكتب عليها تدويناتي كلها من هذه القناة الجميلة (اضغط هنا)

5- اضف الزهور والنباتات

ما اعرف اذا تتفق معايا أو لا، بس المكان الي يكون فيه نباتات وزهور ينقط جمال وراحة، الموضوع ما يحتاج ميزانية و50 نبتة و 100 وردة، كل الي تحتاجه تحط كم وردة ونبتة وحدة بالقليلة في المكان الي تقعد فيه كثير أو جنب سريرك.

طبعاً ممكن وبشكل كبير تحطها وتصير زيها زي أي شيء تاني وما تلاحظها، فالشي المهم أنك تلاحظها بعد ما تحطها. بالنسبة لي كل يوم أول ما اصحى وقبل ما انام أحاول أتذكر المس نبتتي والاحظ جمالها، شعور لا يوصف لما أتواصل معاها.

6- أشرب وكل أكلك في أجمل الأواني الي عندك

تعرفوا حركات اشيل هذا للضيوف وأنا أكل في الحاجات الروتينية القديمة، لا لا وألف لا، أنت مهم كمان، لما تشتري كاسات للضيوف اشتري لنفسك كمان كاسة فخمة تشرب فيها مويتك، أشتري صحون جميلة ليك، قدّم أكلك بطريقة جميلة لنفسك زي ما تسوي مع الناس.

كيف ممكن تلاحظ الجمال حوليك إذا أنت بنفسك تحط قدام نفسك أشياء مو جميلة باستمرار؟ عشان تساعد نفسك على ملاحظة الجمال يحتاج انك بعض الأوقات تخلق واقع جميل حوليك، تقولوا حتى على شوكة وسكينة؟ يب حتى على شوكة وسكينة.

7- وزّع الحاجات الي ما تشعرك بالجمال

إن كان أواني في المطبخ  أو ملابس أو تحف، أي شيء صار وجوده ما يضيف لك ولشعورك بالجمال، سلّم عليه وودعه. كل ما قللّت الحاجات الي تحسسك بعدم الجمال، زادت ملاحظتك وشعورك بالجمال لأنه ما في أشياء تشتت انتباهك عنه.

8- حافظ على النظافة والترتيب

الشيء الجميل نظيف ومرتب، كيف ممكن تحس انك مغموس بالجمال وعيونك تشوف غرفتك المبهدلة وملابسك ودولابك الغير منظم؟

كيف تحس بالجمال إن كانت دفاترك وأوراقك مبعثرة؟ و أجهزتك غير منظمة ولا مرتبة ومليانة حاجات غير جميلة؟

قبل تقول حياتي ما فيها جمال كيف تبغيني الاحظ الجمال، اشتغل على الي عندك واظهره بأفضل طريقة ممكنة.

تكلمنا في تدوينه سابقة عن الحركة الي تعتبر قانون الحياة

إذا تبغى تكون مغموس مغمور بالجمال، تحرك نحو الجمال

9- أخرج ولاحظ الجمال

اخرج ولاحظ الجمال الموجود في الشارع، في الحي، في المدينة، وين ما كنت أكيد في جمال، أخرج وانظر للسماء، واستشعر بالأرض الي قاعدة تسندك اسفل قدميك، أخرج من النظرة المحصورة، لا تشوف الأمور من خرم ابرة، انظر للأمور من نظرة أوسع، استشعر جمال كوكب الأرض وهو يدور فيك بدون ما تحس، جمال الشروق والغروب والوانهم ومشاعرهم، جمال الشجرة على حافة الطريق، جمال حركة الناس واختلافاتهم، جمال قدرتنا على الذهاب من مكان لمكان، جمال السحاب والنجوم، جمال التجاعيد على وجه المسنين، جمال براءة الأطفال.

يااااااااه قد ايش في جمال، وكل الي عليك تلاحظ!

أخيراً

هذه بعض الأمور الي ممكن تخليك مغمور بالجمال أكثر، بسيطة وأكيد كثير منها تعرفوها، بس السؤال هل كثير مننا نطبقها؟ (اصدقاء مدونتي جميلين فا اكيد يعملوا اغلبها) :)

شكراً لمتابعتكم ومن هنا إلى لقاء آخر على طريق الجمال أستودعكم الله.

كونوا بخير، كونوا بعافية وحب وجمال